जिगरबाज तरूण श्री मंगेश चव्हाण

 

        तीन वर्षांपूर्वी एका तरूणाचा मला फोन आला."काका मी नोकरी सोडतोय आणि  स्वत: एक कॉलेज काढण्याचा विचार करतोय." जे कॉलेज तो सोडणार होता त्या कॉलेजचा प्राचार्य या नात्याने त्या कॉलेजला नावलौकिक मिळवून देण्यात त्याचा मोठा वाटा  असल्याच मी जवळून पाहिलं होतं.त्याबाबत एका वार्षिक स्नेहसंमेलनात व्यासपीठावरून मी भरभरून कौतुकही केलं होतं.त्याच्या कर्तृत्वाचा आवाका मला माहित असल्यानं त्याच्या धाडसाबद्दल मला कौतुकच वाटलं पण घाई घाईने आणि अति आत्मविश्वासानं घेतलेले निर्णय नंतर चुकीचे ठरतात.बरं सध्याच्या संस्थेबरोबर काय बिनसलंय का,त्याची कारणे याची सर्व माहिती घेताना नव्या संस्थेबाबत कशी वाटचाल करावी लागणार ?भांडवल ,जागा,नवीन कर्मचारी नियुक्त्या, परवानग्या आणि त्याच बरोबर त्याच क्षेत्रातली स्पर्धा याबाबत आम्ही तासनतास बोलत असतांना त्याचा ठाम निश्चय व येणा-या समस्येशी टक्कर देण्याची उमेद मला बरंच काही सांगत होती.एक जवळचा आपला माणूस म्हणून तो मोकळेपणे बोलत असल्यानं मी सुद्धा तेवढ्याच आपलेपणाने 'हो पुढे ' म्हटले.त्याने ठरवल्याप्रमाणे पण नियोजनपूर्वक आखणी करीत तीन वर्षापूर्वी कोरोनाची धग कमी होत असतांना लांज्यातल्या मुंबई गोवा हमरस्त्याला खेटून असलेल्या एका इमारतीच्या पहिल्या मजल्यावरील विस्तीर्ण जागेत कॉलेज थाटण्याचे काम सुरू झाले.त्या प्रत्येक टप्प्यावर मला ' पाहून जा ' हे त्याचे आपुलकीचे सांगणं मला कधीच नाकारता आलं नाही.जणू मी सुद्धा त्या कॉलेजचा भाग आहे इतपत वाटावं असं त्याचं माझ्याशी बोलणं मला अधिक जवळ करून गेलं.उद्घघाटनाच्या कार्यक्रमात मी कौतुकानं सांगितलं " मंगेश चव्हाण यांनी कल्पना कॉलेज ऑफ हॉटेल मॅनेजमेंटची स्थापना करून कोकणातल्या तरूणांना नवा संदेश दिला आहे.आता नोक-या करण्याचा जमाना संपवायला हवाय.स्वत:च्या हिमंतीवर रोजगार निर्माण करायला हवाय.

          कल्पना कॉलेजने थोड्याच अवधीत नाव कमावलंय.हॉटेल मॅनेजमेंटच्या जोडीला नर्सींग,फॅशन डिझायनींग हे कोर्सही इथे असल्याने इथे शिकून स्वत:च्या पायावर उभे राहण्याचे ज्ञान मिळतेच त्याचबरोबर वेगवेगळ्या इन्स्टीट्युटना अभ्यासभेटीतून मुलांना समग्र देण्याचा प्रयत्न केला जातो.संस्थेत विविध उपक्रम सातत्याने राबवून मुलांच्या नेतृत्व विकासाला चालना दिली जाते.विविध संस्थांच्या कार्यक्रमात प्रत्यक्ष जबाबदारी देऊन मुलांचा आत्मविश्वास वाढविताना राजापूर लांजा तालुका नागरिक संघाच्या सातव्या ग्रामीण मराठी साहित्य संमेलनापासून या काॅलेजमध्ये शिकणारी मुले त्यांचे खाद्य पदार्थांचे स्टाॅल लावतात. काही मुले स्वयंसेवकाचे काम करतात तसेच व्यासपीठावर एखादे सुंदर नृत्यही सादर करतात.त्यांचे फॅशन डिझायनिंग ची मुले स्वतः शिवलेले विविध पोषाख परिधान करून कॅटवाॅक करून जो कार्यक्रम करतात त्याला प्रेक्षकांचा जबरदस्त प्रतिसाद मिळतो. असे विविध अनुभव व व्यवसाय शिक्षण घेऊन बाहेर पडल्यानंतर त्या मुलांना  कामाचाअनुभव मिळावा म्हणून अनेक हॉटेल्स व हास्पिटलशी बोलून मुलांच्या नोकरीची व्यवस्थाही मंगेश चव्हाण करीत असतात. मुंबई, पुणे,कोल्हापूर आणि रत्नागिरीत  अनेक मुलांना नोकरी मिळवून देण्याचे काम केले आहे.म्हणूनच आपल्या पाल्याचा भविष्याचा आधार म्हणून अनेक पालक या कॉलेजकडे बघत आहेत.

           आता काॅलेज नव्या जागेत आणि अधिक  विस्तीर्ण जागेत असतांना इन्फिगो आय केअर या नामवंत संस्थेचे पाठबळ मिळाले आहे ही फार मोठी जमेची बाजू म्हणावी लागेल.सतत उपक्रमशील असणाऱ्या या काॅलेजला २०० प्रेक्षक बसतील असे सभागृह असल्याने लांजातील अनेक संस्था त्यांचे  छोटेखानी कार्यक्रम करण्यास कल्पना काॅलेजला प्राधान्य देत असतात.
           आज त्यांचा वाढदिवस आहे.त्यांना शुभेच्छा देताना त्यांच्या कॉलेजमधून कोकण पर्यटन विकासास पुढे नेणारी पिढी निर्माण होवो अशी परमेश्वराकडे प्रार्थना करतो.

सुभाष लाड
९८६९१०५७३४

         Mangesh chavan 7377177191